Current Edition >> Archives Section >> Editorial Comment >> 8 May 2007

Editorial Comment

Dink groot!
“Aangesien ek in elk geval gaan dink kan ek net sowel groot dink”, het iemand by geleentheid gesê en hoe waar is dit nie! Dit is waar van elke faset van 'n mens se lewe – jou studie, jou besigheid, jou sport, jou loopbaan, selfs jou huwelik, noem maar op. Dit is ook so dat die lewe besaai lê met stukende drome, dis deel van die lewe en sy misterie. Dit wys net dat 'n mens realisties moet wees. Miskien lê die antwoord in kop in die wolke en voete op die grond. Ten diepste kom dit neer op geloof – “As julle geloof soos 'n mosterdsaadjie het, sal julle vir die berg kan sê lig jouself op en gooi jou in die see”, het iemand eenkeer langs die Galilese Meer gesê. Dié geloof kan 'n mens net hê as jy die Een ken wat dit gesê het. As dìt so is, dan kan jy groot dink. En sonder om groot te dink, kan jy nie groot bereik nie.